Qeveria, sytë nga Poliçani i kallashëve e jo vetëm

Shqipëria synon të riaktivizojë përmes investimeve zhvillimin e industrive të reja ushtarake në plotësim edhe të kërkesave në rritje të tregut botëror, kumtoi këtë të mërkurë ministri i Mbrojtjes Niko Peleshi.

Ai tha se për fat të keq ka një kërkesë të madhe në tregun botëror për municione e armatim dhe që Shqipëria, sipas tij, “është nga vendet e pakta në rajon dhe Europë që nuk e ka të zhvilluar, por e ka të fjetur industrinë e vet të dikurshme ushtarake”.

“Natyrisht ka nevojë për investime, për investitorë, nuk mund të zhvillohet kjo sipërmarrje private nga shteti, apo nga ish-ndërmarrjet shtetërore. Ndërmarrjet shtetërore tani ne i kemi në proces transformimi në shoqëri aksionere, të paktën në sektorin e sigurisë dhe mbrojtjes”, tha Peleshi.

“Jemi të hapur dhe në pritje të ofertave dhe interesimeve që nuk mungojnë nga aktorë të ndryshëm ndërkombëtarë por sipërmarrje vendase”, shtoi ai.

“Synojmë ta riaktivizojmë përmes investimeve dhe ta vëmë në punë sektorin, për të zhvilluar industri të reja ushtarake në plotësim edhe të kërkesave në rritje të tregut, për fat të keq për shkak të konflikteve që sa vijnë edhe shtohen”, argumentoi Peleshi.

Ai përmendi tre pika të mundshme të riaktivizimit të industrisë ushtarake, kun ë krye është Poliçani. Pas tij janë ish-uzina e lëndëve plasëse të Mjekësit dhe kombinati i Gramshit.

“Poliçani s’ka fare aktivitet, dy tjerat kanë pak aktivitet, që lidhet me demontimin dhe  sigurojnë disa të ardhura për të mbajtur veten e vet. Nuk kanë detyrime si në rastin e Poliçanit”, tha Peleshi. /tesheshi.com/