Përgatitjet për Kampionatin Botëror të Futbollit 2026 kanë hyrë në fazën e tyre përfundimtare, teksa aktiviteti pritet të nisë së shpejti në Meksikë, Shtetet e Bashkuara të Amerikës dhe Kanada.

Ky do të jetë edicioni i parë në histori që do të mirëpresë 48 kombëtare, duke sjellë një organizim më të gjerë dhe një numër më të madh ndeshjesh.

Megjithatë, përtej aspektit sportiv dhe diskutimeve teknike mbi skuadrat favorite, vëmendja e një pjese të opinionit publik në rrjetet sociale është përqendruar te disa interpretime mistike që lidhen me këtë ngjarje globale.

Në qendër të këtyre diskutimeve virtuale janë vendosur sërish thëniet e parashikueses bullgare, Vangelia Pandeva Gushterova, e njohur gjerësisht si Baba Vanga. Sipas personave që merren me interpretimin e vizioneve të saj të mbetura në dorëshkrime apo dëshmi të mbledhura ndër vite, ajo ka lënë një mesazh që lidhet me një ngjarje të madhe sportive me përmasa botërore.

Në këto interpretime pretendohet se gjatë zhvillimit të këtij aktiviteti, në qiell do të shfaqet një dritë e re e paidentifikuar, e cila do të jetë e dukshme për njerëzit në mbarë planetin.

Ky pretendim ka nxitur diskutime të shumta midis atyre që besojnë në teoritë e konspiracionit dhe komunitetit shkencor që i konsideron këto interpretime si thjesht sajesa mediatike për të tërhequr vëmendje.

Mbështetësit e këtyre teorive përpiqen t’i lidhin thëniet e saj me raportimet e shpeshta të kohëve të fundit nga agjencitë qeveritare, përfshirë ato në Shtetet e Bashkuara, lidhur me objektet fluturuese të paidentifikuara apo fenomenet anomale në atmosferë.

Sipas tyre, përkon që vëmendja e miliarda njerëzve të jetë e përqendruar në një pikë të vetme, çka do t’i jepte çdo dukurie hapësinore një audiencë maksimale.

Nga ana tjetër, analistët e medias dhe sociologët theksojnë se shfaqja e këtyre profecive pikërisht përpara ngjarjeve të mëdha është një fenomen i përsëritur që shfrytëzon interesin masiv të publikut.

Figurat si Baba Vanga apo Nostradamusi përdoren rregullisht nga faqe të ndryshme interneti për të gjeneruar klikime, duke përdorur fraza të përgjithshme që mund t’i përshtaten pothuajse çdo epoke apo ngjarjeje politike e sportive.

Çdo pretendim për dukuri jashtëtokësore apo kozmike në periudha të tilla mbetet në kuadrin e spekulimeve të paverifikuara, pasi asnjë institucion shkencor apo agjenci hapësinore nuk ka dhënë të dhëna për rreziqe apo anomali të kësaj natyre gjatë muajve në vijim.