Sa fiton Shell-i i Shpiragut brenda një viti në SHBA?

Gjigandi britanik i naftës Shell, ai që po merret me zbulimin e burimeve të naftës në Shpirag të Beratit, fiton një miliard dollarë në vit duke tregtuar naftë në SHBA, sipas dokumenteve të paraqitura në padinë e një ish-punonjësi.

Dëshmia e John Dimech, ish-shefit të departamentit të tregtisë së Shell, në një gjykatë në Teksas dha një mundësi të rrallë për të parë detaje financiare që Shell i trajton si sekrete tregtare, duke përfshirë fitime të mëdha në tregti dhe bonuse shumë milionëshe për tregtarët, raporton Reuters.

Dimech punoi në grupin e tregtimit të naftës së papërpunuar të Shell në Hjuston për 11 vjet dhe tha vitin e kaluar se divizioni i tregtimit të naftës së papërpunuar zakonisht fitonte midis 950 milion dhe një miliard dollarë në vit. Kjo barazohet me 13 deri në 15 për qind të fitimeve totale të Shell në SHBA para taksave në vitet e kaluara, sipas llogaritjeve të bazuara në dosjet e kompanisë.

Raporti tatimor i Shell për vitin 2022 thotë se ata bënë biznes në SHBA atë vit me një fitim para taksave prej pak më shumë se shtatë miliardë dollarë. Një vit më parë ishte rreth 6.36 miliardë dollarë.

Një zëdhënës i Shell nuk pranoi të komentojë mbi akuzat.

Kompania britanike e naftës nuk publikon rezultatet financiare të Divizionit të Tregtisë së Naftës dhe Gazit, të cilin e konsideron më të madhin në botë. Megjithatë, mungesa e informacionit i shqetëson disa investitorë, pasi që biznesi mund të gjenerojë fitime të mëdha, por edhe humbje.

Tregtarët fitojnë para duke blerë dhe shitur naftë dhe gaz në rastin më të favorshëm, i cili përcaktohet nga marrëdhënia midis ofertës dhe kërkesës. Paga e tyre zakonisht përfshin bonuse të mëdha, kështu që CEO Wael Sawan mori një bonus prej 2.7 milionë paund (3.15 milionë euro) vitin e kaluar, sipas Reuters, duke cituar një raport biznesi.