Ministrat nga tre kontinente po kërkojnë taksa për super të pasurit

Një grup ministrash nga Evropa, Amerika e Jugut dhe Afrika kërkuan taksa më të larta për qytetarët më të pasur në mbarë botën, duke paralajmëruar se detyrimet tatimore duhet të jenë proporcionale me fuqinë paguese.

“Aktualisht ka rreth 3000 miliarderë në botë. Taksa mund të vendoset si një taksë minimale prej dy për qind mbi asetet e super të pasurve”, shkruan Svenja Schulze, ministrja gjermane e zhvillimit, në një artikull të botuar në Der Spiegel.

Artikulli është nënshkruar nga ministri spanjoll i ekonomisë Carlos Cuerpo, ministrja spanjolle e financave Maria Jesus Montero, ministri i financave të Afrikës së Jugut Enoch Godongwana, dhe ministri brazilian i ekonomisë Fernando Haddad, dhe është publikuar në Guardian dhe El Pais.

Parimi i drejtësisë

“Miliarderët që tashmë paguajnë shumën e duhur të tatimit mbi të ardhurat nuk do ta paguanin tatimin. Megjithatë, të gjithë ata që arrijnë të shmangin tatimin mbi të ardhurat do të duhet të japin një kontribut më të madh për të mirën e përbashkët”, shtuan ministrat.

Sistemet tatimore duhet të jenë në përputhje me parimin e drejtësisë, thanë ata.

“Për ta arritur këtë, kontributi i çdo individi duhet të jetë në përputhje me aftësinë e tij për të paguar. Për shkak të përfitimeve tatimore të vlefshme, më të pasurit arrijnë të ulin taksat mbi të ardhurat e tyre në nivelin më të ulët të mundshëm”, paralajmërojnë ministrat.

Investimet në shërbimet publike

Në nivel global, miliarderët paguajnë tatim mbi të ardhurat me një normë prej vetëm 0.5 për qind. Ministrat e quajnë epokën e re të taksave një hap në rrugën drejt një shoqërie më të drejtë.

“Taksa do të gjeneronte njëkohësisht të ardhura shumë të nevojshme për qeveritë për të investuar në shërbime publike si shëndetësia, mjedisi dhe infrastruktura”, shkruan ata.

“Nga kjo do të përfitonin të gjithë, përfshirë ata që janë në krye të piramidës së të ardhurave. Vlerësohet se një taksë e tillë mund të gjenerojë çdo vit 250 miliardë dollarë të ardhura shtesë në nivel global”.