Botë me kohë bollëku e mbytur në borxhe…(!)

Ekonomia botërore ka treguar elasticitet befasues ndaj rritjes së normave të interesit dhe goditjeve që rrjedhin nga luftërat në Ukrainë dhe Gaza, por ka shumë arsye për shqetësim, tha Drejtoresha e Fondit Monetar Ndërkombëtar (FMN), Kristalina Georgieva.

Georgieva theksoi se inflacioni i vazhdueshëm dhe niveli në rritje i borxhit kombëtar shkaktojnë shqetësim të veçantë, transmeton AP.

“Inflacioni ka rënë, por nuk është zhdukur”, theksoi presidentja e FMN-së.

Georgieva gjithashtu theksoi se borxhet e qeverisë po rriten në të gjithë botën.

Borxhi publik global u rrit në 93 për qind të PBB-së në 2023 nga 84 për qind e PBB-së në 2019, pasi qeveritë duhej të shpenzonin më shumë për kujdesin shëndetësor dhe ndihmën ekonomike gjatë pandemisë së koronavirusit.

Presidentja e FMN-së u bëri thirrje vendeve që të mbledhin taksat dhe të shpenzojnë paratë publike në mënyrë më efikase.

Problemi i një fuqie punëtore të plakur

“Në një botë ku krizat po vijnë, vendet duhet të ndërtojnë urgjentisht qëndrueshmëri fiskale në mënyrë që të jenë gati për goditjen e radhës”, tha Georgieva.

Një nga arsyet e rritjes së ngadaltë globale, shtoi Georgieva, është rritja zhgënjyese e produktivitetit.

Ajo tha se vendet nuk kishin gjetur mënyra për të sinkronizuar punëtorët dhe teknologjinë në mënyrë më efektive dhe se vitet e mëparshme me norma të ulëta interesi kishin lejuar “firmat që nuk ishin konkurruese të qëndronin në këmbë”.

 Georgieva deklaroi gjithashtu se në shumë vende, fuqia punëtore e plakur “nuk sjell dinamizmin” e nevojshëm për rritje më të shpejtë ekonomike.

Sipas saj, shtetet mund të ndihmojnë ekonomitë e tyre nëse shkurtojnë burokracinë dhe tërheqin më shumë gra në tregun e punës.