Konferenca e Kryetarëve, PD-së i refuzohet interpelanca me Ramën për emisionin në Rai 3!

Debate në mbledhjen e Konferencës së Kryetarëve të mbledhur sot e ku demokrati Gazment Bardhi, sërish kërkoi që në seancën plenare të radhës në Kuvendin e Shqipërisë, të zhvillohet një interpelancë me kryeministrin Edi Rama, sipas tij, “për ndërhyrje te Rai italian”, pas emisionit të televizionit Rai 3 në lidhje me marrëveshjen e emigrantëve, Itali-Shqipëri.

Kryeparlamentarja Lindita Nikolla i vuri në dukje se objekti i kërkesës së Bardhit, nuk ka lidhje me procedurën për të cilën do të duhet që kryeministri të thirret në interpelancë. Bardhi e akuzoi Nikollën se “po reciton atë që i kanë shkruar”.

Pas debatit me Nikollën, Gazment Bardhi braktisi mbledhjen, së bashku me deputetin Agron Gjekmarkaj. Kjo për shkak se kërkesa e tij nuk është miratuar.

Lidhur me emisionin në Rai 3 për marrëveshjen e emigrantëve Itali-Shqipëri e reagimet që pasuan, dje foli edhe Giorgia Meloni. Në konventën e partisë Fratelli D’Italia e që u zhvillua në Pescara, kryeministrja italiane theksoi se Shqipëria dhe kryeministri Rama u sulmuan lidhur me përpjekjet për t’i ndihmuar për emigrantët.

Burimi: vovmagazine.al