Vesi i pashërueshëm: kështu Basha e “lë punën e sotme për nesër”…

Kreu i PD-së zyrtare, Lulzim Basha, doli para medias për të bërë një akuzë të re në lidhje më çështjen “McGonigal”, njeriut të FBI-së që u dënua me 28 muaj nga drejtësia amerikane “për shkelje të rëndë të besimit të publikut”, lidhur me 225 mijë dollarët që mori nga shqiptaro-amerikani Agron Nezaj dhe mosdeklarimin e kontakteve me zyrtarë të Shqipërisë, përfshirë me kryeministrin Edi Rama.

Sipas tij, Charles McGonigal është i përfshirë dhe në aferën e Inceneratorëve. “Dikush shpreson që ky të jetë kapaku i korrupsionit, por i them mos gënje veten, ky është vetëm fillim. Përgjegjësisë nuk do i shpëtojë askush”, tha Basha.

Por sa i përket kësaj akuze, ai tha se do të japë detaje në vijim. Kështu, me gjuhë populli, ai “e la punën e sotme për nesër”.

Fare mirë, denoncimin me fakte duhej dhe mund ta kishte bërë që sot. Tashmë duhet të priten ditët në vijim nëse do ofrojë vërtet fakte apo do vijojë të shfaqë vesin politik që të të lënit “për nesër”.

Basha pretendon se Rama, me anë të Charles McGonigal, është investuar në luftë kundër tij.

“Dje drejtësia amerikane foli, McGonigal pranoi operacionin e pisët kundër Bashës dhe PD dhe u dënua”, tha Basha, pa cituar të dënuarin se me ç’deklaratë e pohoi këtë gjë.