SHBA dhe BE, thirrje Kosovës për dinarin

Ambasadori amerikan në Kosovë, Jeffrey Hovenier, u ka bërë thirrje autoriteteve kosovare që të vonojnë zbatimin e dekretit të Bankës Qendrore të Kosovës për heqjen e dinarit nga qarkullimi, duke lënë vetëm euron si monedhë kryesore dhe të vetme.

Pas një takimi me Guvernatorin e Bankës Qendrore, Hovenier deklaroi se zbatimi i rregullores së re duhet të vonohet sepse mund të ndikojë negativisht tek qytetarët. Kosova miratoi euron në vitin 2002, por dinari ende përdoret në vendet e banuara nga serbët që marrin pagesa ose ndihmë financiare nga Serbia në atë monedhë.

Por Banka Qendrore e Kosovës ka bërë të ditur se nuk e ndalon apo kufizon këmbimin e asnjë valute.

“Rregullorja nuk e ndalon apo kufizon pranimin e mjeteve në llogaritë bankare në euro në bankat e licencuara dhe as nuk kufizon aktivitetin e këmbimit të ndonjë valute përmes institucioneve financiare bankare apo jobankare të licencuara nga Banka Qendrore e Kosovës”, thuhet në deklaratë.

Shqetësimet e Bashkimit Evropian

Bashkimi Evropian po kërkon gjithashtu shtyrjen e ndalimit të përdorimit të dinarit.

Siç ka sqaruar zëdhënësi i Bashkimit Evropian, Peter Stano, ekziston shqetësimi se si kjo rregullore do të ndikojë te serbët në Kosovë, veçanërisht në spitale dhe shkolla, por edhe në jetën e përditshme në komunat me shumicë serbe.

Bashkimi Evropian bën thirrje për një periudhë  tranzicioni në mënyrë që të dyja palët të mund të gjejnë një zgjidhje brenda dialogut.

“Ky dekret do të ndikojë drejtpërdrejt edhe në jetën e përditshme të shumicës së serbëve në Kosovë që marrin paga apo ndihmë financiare nga Serbia në dinarë. Për shkak të pasojave të mundshme të kësaj rregulloreje në procesin e normalizimit të marrëdhënieve ndërmjet Kosovës dhe Serbisë, presim që aspektet që kanë të bëjnë me komunitetin serb në Kosovë do të trajtohen në kuadër të dialogut, i cili ndërmjetësohet nga Bashkimi Evropian”, tha Stano.