Gaza, tronditja e mjekut norvegjez me Perëndimim

Profesori dhe doktori norvegjez Mads Gilbert tha se skenat brutale nga Gaza tejkalojnë të gjithë mizorinë që ka parë në jetën e tij deri më tani dhe se është i tronditur nga standardet e dyfishta të qeverive perëndimore ndaj palestinezëve, transmeton Anadolu.

Në Stamboll, Gilbert mori pjesë në konferencën “Palestina dhe e ardhmja e marrëdhënieve globale” organizuar nga Universiteti Ibn Haldun.

Në një intervistë për agjencinë Anadolu, ai iu referua konkretisht gjyqit të Izraelit para Gjykatës Ndërkombëtare të Drejtësisë (GJND) për akuzën e shkeljes së Konventës së Gjenocidit.

“Më mjafton të shoh sesi ushtria okupatore izraelite e ekspozon popullin palestinez në Gaza ndaj urisë, dehidrimit, ngrirjes, bombardimeve dhe lëndimeve të rënda. Për mendimin tim, ky është një krim lufte dhe i kalon të gjitha krimet që kam parë në jetën time. Ky është padyshim shumë më tepër se një operacion i thjeshtë ushtarak. Ky është dënimi i gjithë popullatës edhe pse dënimi kolektiv është i paligjshëm. Ky është një sulm ndaj popullatës civile, grave, fëmijëve, të moshuarve, kujtdo që nuk mban armë dhe një luftë e gjithanshme kundër sistemit shëndetësor palestinez, që është në kundërshtim me të drejtën ndërkombëtare”, tha Gilbert.

Ai theksoi se uria është bërë një armë e shkatërrimit në masë.

“Çfarë lloj njeriu, me qëllim dhe plan, bën që më shumë se një milion fëmijë të vdesin nga uria dhe të mos kenë akses në ujë të pastër? Në cilin vit jemi? Jemi në vitin 1600, 1400 apo 2024?”, pyeti ky mjek i nderuar.

Siç tha ai, detyrimi i njerëzve për uri dhe etje është një e keqe e paramenduar dhe mënyra më e dhimbshme për të sulmuar vullnetin e popullit palestinez për të rezistuar.

Ai beson se është e qartë se Izraeli po kryen një politikë kolonialiste kundër popullit palestinez.

Ai theksoi se Izraeli po e detyron popullin palestinez të largohet nga Gaza duke i lënë të uritur.

“Problemi i Palestinës dhe Izraelit nuk është një konflikt i vështirë, pasi ky është një pushtim i vërtetë”, tha Gilbert.

Ai kujtoi se Izraeli po sulmon edhe Agjencinë e Kombeve të Bashkuara për Ndihmën dhe Punën për Refugjatët Palestinë (UNRWA).

Ai shprehu zemërim dhe pakënaqësi të veçantë ndaj qeverive të vendeve perëndimore të cilat vetëm në heshtje vëzhgojnë sulmet izraelite kundër palestinezëve.

 “Jam i tmerruar, i tronditur dhe shumë i zemëruar që qeveritë perëndimore nuk e kanë ndaluar Izraelin përmes sanksioneve, bojkoteve dhe mjeteve paqësore politike, siç kanë bërë kundër Rusisë për pushtimin e saj në Ukrainë. Këto standarde të dyfishta janë shumë të turpshme për të gjithë ata që e quajnë veten miq të racës njerëzore, miq të njerëzimit dhe mbrojtës të së drejtës ndërkombëtare”, tha ai.