City fiton derbin e Manchesterit

Manchester City e ka mposhtur Manchester Unitedin në derbin e xhiros së 27-t të Premier Leagues. Në duelin e luajtur të dielën në “Etihad Stadium” City triumfoi me rikthim të rezultatit 3:1.

Me këtë fitore, City ka tubuar 62 pikë dhe zë vendin e dytë në tabelë, me një pikë më pak se Liverpooli që është lider. Ndërkohë, Manchester Unitedi mbetet në pozitën e gjashtë me 44 pikë të grumbulluara.

Skuadra e Unitedit kaloi në epërsi me golin e bukur të Marcus Rashfordit në minutën e tetë dhe me rezultatin 1:0 përfundoi pjesa e parë. Në pjesën e dytë, City u kundërpërgjigj me tri gola.

Fillimisht, Phil Foden barazoi shifrat në 1:1 me folin e shënuar në minutën e 56-të, përpara se ta shënoj edhe golin e tij të dytë personal në minutën e 80-të për ta kaluar Cityn në epërsi 2:1.

Në minutën e parë të kohës shtesë, sulmuesi Erling Haaland vulosi rezultatin përfundimtar 3:1 me golin e realizuar.

Për Haalandin, ky ishte goli i 18-të këtë edicion në Premier League.